Aqrar sektorda özünüməşğulluğun formalaşması və inkişafı üzrə xarici təcrübənin qiymətləndirilməsi

Məqalədə özünüməşğulluğun formalaşması və inkişafı üzrə, o cümlədən aqrar sektorda əldə edilmiş xarici təcrübə təhlil edilmişdir. İnkişafetmiş ölkələrin, İqtisadi Əməkdaşlıq və İnkişaf Təşkilatına (İƏİT) üzv ölkələrin təcrübəsi nəzərdən keçirilmişdir. Qərbi Avropa, ABŞ və Kanadada özünüməşğulluğun tənzimlənməsi və inkişafının stimullaşdırılması üzrə tətbiq edilən sistemlər səciyyələndirilmişdir. İqtisadiyyatın müxtəlif sahələrində, o cümlədən aqrar sektorda özünüməşğulluğun formalaşması və tənzimlənməsi məsələləri postsovet məkanı ölkələrinin timsalında nəzərdən keçirilmişdir. Müxtəlif ölkələrdə aqrar sektorda özünüməşğulluğun inkişafı mühitini formalaşdıran bəzi iqtisadi və institusional amillərə diqqət yetirilmişdir. Müxtəlif inkişaf səviyyəsində olan ölkələrdə kənd yerlərində məşğulluğun bu növünün dəstəklənməsi üzrə dövlət proqramlarının yeri və rolu müəyyən edilmişdir. İlkin yanaşmada aqrar sektorda özünüməşğulluğun inkişafı üzrə qabaqcıl təcrübənin ölkəmizdə tətbiqi imkanları qiymətləndirilmişdir.