Aqrar sahənin rəqəmsallaşmasının inkişaf meyilləri

Məqalədə müasir dövrün qaçılmaz innovasiyalarından olan rəqəmsallaşma, əşyaların interneti və onun aqrar sahədə tətbiqi imkanları araşdırılmış, müəyyənləşdirilmişdir ki, son onilliklərdə kənd təsərrüfatında maraqlı tərəflər öz əməliyyatlarını təkmilləşdirmək üçün rəqəmsal alətlərdən getdikcə daha çox istifadə edirlər. Xüsusilə inkişaf etmiş ölkələrdə rəqəmsal və avtomatlaşdırma texnologiyalarının, asanlıqla idarə olunan cihazların geniş yayılmasından aydın görünür ki, ən ucqar bölgələrdə mobil şəbəkələrə çıxışın yaxşılaşdırılması və internet əhatəsinin genişlənməsi artıq təmin edilmişdir və bu da kənd təsərrüfatında ciddi dəyişiklikləri reallığa çevirməkdədir. Buna baxmayaraq iqtisadiyyatın rəqəmsallaşmasından irəli gələn köklü transformasiya qlobal kənd təsərrüfatı sistemləri üçün hələ tam reallaşmayıb.