Beynəlxalq nəqliyyat dəhlizlərinin kənd təsərrüfatı məhsullarının bazara çıxarılmasına təsiri

Kənd təsərrüfatı milli iqtisadiyyatın çox mühüm sahəsi olaraq regional inkişaf, ərzaq təminatı və təhlükəsizliyi, məşğulluğun təmin olunması və s. kimi istiqamətlərdə vacib əhəmiyyət kəsb edir. Bu sahə cəmiyyətin gündəlik normal yaşayışının əsasını təşkil etməklə, həm də riskli sahələrdən biri hesab edilir. Əsasən yaş və tez xarab olan kənd təsərrüfatı məhsullarının istehsalı ilə yanaşı, satışı, saxlanması da xüsusi yanaşma tələb edir. Ölkəmizin qoşulduğu beynəlxalq nəqliyyat dəhlizləri kənd təsərrüfatı məhsullarının daxili və xarici bazarlara çıxarılmasında xüsusi əhəmiyyət kəsb edir. Aydındır ki, səmərəli və çevik satış uzunmüddətli və rentabelli istehsal üçün əsasdır. Bu baxımdan da beynəlxalq nəqliyyat dəhlizlərinin kənd təsərrüfatı məhsullarının ixracına təsirləri ekonometrik qiymətləndirilib. İnfrastruktur investisiyalarının kənd təsərrüfatı məhsullarının ixracı üçün daha önəmli olması əsaslandırılıb ki, bu da, daha çox kənd təsərrüfatı məhsullarının xüsusi saxlama və daşıma qaydaları tələb etməsi ilə bağlıdır. Məqalənin sonunda kənd təsərrüfatı məhsullarının ixracında beynəlxalq nəqliyyat dəhlizlərinin rolunun artırılması istiqamətində təklif və tövsiyələr verilibdir.