Aqrar bazarda rəqabət mühitinin formalaşması amilləri: modern baxışların təhlili

Məqalədə aqrar bazarlarda rəqabət mühitinin formalaşması amillərinin dəyərləndirilməsinə müasir yanaşmalar konseptual planda təhlil olunur. Tədqiqatın məqsədi aqrar bazarlarda rəqabət münasibətlərinin yalnız klassik bazar strukturu göstəriciləri ilə deyil, həm də istehsalın bioloji xüsusiyyətləri, risk mühiti və bazar iştirakçıları arasında formalaşan koordinasiya və sövdələşmə münasibətləri ilə müəyyən olunmasına dair baxışların araşdırılmasıdır. Məqalədə sənaye iqtisadiyyatı çərçivəsində formalaşmış Structure-Conduct-Performance (SCP) paradiqması nəzəri baza kimi təqdim edilir və onun aqrar sektora tətbiqinin məhdudiyyətləri göstərilir. Eyni zamanda, aqrar-ərzaq dəyər zəncirində struktur asimmetriyalar, emal və pərakəndə ticarət mərhələlərində bazar gücünün konsentrasiyası, supermarket və e-commerce kanallarının inkişafının habelə müqaviləli istehsal, vertikal koordinasiya və inteqrasiya mexanizmləri kontekstində sövdələşmə gücünün rəqabət münasibətlərinə təsirinə dair müasir yanaşmalar araşdırılır və müvafiq dəyərləndirmələr aparılır