Aqrar-sənaye sahəsində innovasiya proseslərinə əsaslanan dayanıqlı inkişafın təmin edilməsi istiqamətləri

Xülasə

Məqalədə müasir şəraitdə kənd təsərrüfatının digər sektorlarla rəqabət apara bilməsi üçün bu sahədə innovasiya prosesləri əsasında dayanıqlı inkişafı təmin edən əsas amillər araşdırılır. İnnovasiya məhsullarda (mallarda və ya xidmətlərdə), proseslərdə, marketinqdə və ya təşkilati metodlarda yeni və ya təkmilləşdirilmiş (texniki və ya başqa şəkildə) bir şeyin tətbiqi kimi müəyyən edilir. Bu məqalədə innovasiya siyasətinin iki əsas modeli tədqiq edilmişdir: 1) elmi-texniki proqramların və dövlət əhəmiyyətli layihələrin həyata keçirilməsinə yönəlmiş innovasiya siyasəti modeli, 2) elmi-texniki biliklərin yayılmasına yönəlmiş innovasiya siyasəti modeli.

Tədqiqatlar göstərir ki, aqrar sahədə sahibkarlığın inkişafı, mütərəqqi kənd təsərrüfatı üsullarına keçid, torpaq, texnika, su və s. maddi ehtiyatlardan səmərəli istifadə etməklə keyfiyyətli məhsul istehsalını artırmaq mümkündür. Məqalədə Azərbaycanın kənd təsərrüfatı məhsullarının emalı sənayesində innovasiyaların təhlili aparılmış, bu sahənin innovativ inkişafının, uzun və dərinləşən dəyər zəncirinin təmin edilməsinin əsas istiqamətlərinə baxılmış və tövsiyələr verilmişdir.