Qloballaşma şəraitində regional inkişafın paradiqması

Məqalədə regional1 inkişafın paradiqmasının qloballaşma şəraitinə uyğunlaşdırılmasının əsas istiqamətlərinin müəyyənləşdirilməsi məqsədilə aparılan tədqiqatın nəticələri əks olunmuşdur. Tədqiqatın metodologiyası sistemli təhlil yanaşmasına əsaslanır. Tədqiqat göstərir ki, qloballaşma ölkələrin və ölkədaxili regionların inkişafına əhəmiyyətli dərəcədə təsir göstərən yeni amillərin və imkanların yaranmasını şərtləndirir. Odur ki, müasir dövrdə regional inkişaf siyasətinin uğuru əhəmiyyətli dərəcədə milli və beynəlxalq amillər və imkanların əlaqələndirilmiş şəkildə istifadə səviyyəsindən asılıdır. Əsaslandırılır ki, ölkədaxili əmək bölgüsünün regionların müqayisəli üstünlükləri nəzərə alınmaqla təkmilləşdirilməsi və “dünya-ölkə-region” əlaqələrinin davamlı və inklüziv inkişafa verdiyi töhfəyə nəzərən optimallaşdırılması qloballaşma şəraitində regional inkişaf siyasətinin prioritet istiqamətləri kimi çıxış edə bilər. Sonda tədqiqatın nəticələrinə əsaslanaraq Azərbaycan Respublikasında regional inkişaf siyasətinin və onun planlaşdırılması sisteminin qloballaşma şəraitinə uyğunlaşdırılması üzrə konseptual tövsiyələr irəli sürülmüşdür.