Azərbaycanda kənd təsərrüfatının digər sahələrlə qarşılıqlı əlaqələrinin qiymətləndirilməsi

Məqalədə kənd təsərrüfatının digər sektorlarla qarşılıqlı əlaqəsini təhlil etmək üçün XərclərBuraxılış Cədvəlindən istifadə edilmişdir. Xərclər-Buraxılış cədvəlləri bir iqtisadiyyatda sektorların bir-biri ilə iqtisadi qarşılıqlı əlaqəsini tələb-təklif münasibətində göstərir. Bu tədqiqatda Azərbaycan üçün mövcud olan ən son 2016-cı il Xərclər-Buraxılış Cədvəlindən istifadə edilmişdir. Bu cədvəl əsasında xərclər-buraxılış modeli hazırlanmışdır. Xərclər-buraxılış modelindən istifadə etməklə kənd təsərrüfatına bir milyon manat həcmində investisiyanın kənd təsərrüfatının özündə və sahə ilə əlaqəli sektorların buraxılışında nə qədər artım yaratdığı hesablanmışdır. Əldə edilən nəticə göstərir ki, kənd təsərrüfatında son tələbatın bir vahid artımı bütün sahələrin məhsulunu 1.794 vahid artırır. Kənd təsərrüfatı sektorunun yüksək geri əlaqəsi onu göstərir ki, o, istehsal üçün digər sektorlardan vəsait tələb edəcək və iqtisadiyyatı stimullaşdıracaq, canlanmanı artıracaq. Araşdırma nəticəsində müəyyən edilib ki, kənd təsərrüfatı Azərbaycan iqtisadiyyatının mühüm sahəsidir.