Aqrar sahənin kreditləşməsinin struktur problemləri

Məqalə Azərbaycanda aqrar sektorun kreditləşdirilməsi sahəsində mövcud problemlərin sistemli şəkildə müəyyənləşdirilməsinə və müvafiq tipologiyasının hazırlanmasına həsr olunmuşdur. Tədqiqatın məqsədi Azərbaycanda aqrar kreditləşdirmə sahəsindəki problemlərin çoxmeyarlı təsnifatını hazırlamaq, onların struktur əlaqələrini üzə çıxarmaq və həlli istiqamətində konkret təkliflər təqdim etməkdir. Tədqiqat çərçivəsində mövcud ədəbiyyat araşdırılmış, Mərkəzi Bankın rəsmi məlumatları təhlil edilmişdir. Problemlər beş tematik qrupda təsnif edilmişdir: məlumat və qiymətləndirmə asimmetriyası, risklərin bölüşdürülməsi mexanizmlərinin qeyri-kafiliyi, kredit təklifinin struktur uyğunsuzluğu, tranzaksiya xərcləri və institusional koordinasiya problemləri, dəyər zəncirinin fraqmentarlığı. Məqalədə çoxpilləli maliyyə arxitekturasının qurulması, aqrar sığortanın inkişafı, dəyər zənciri kreditləşdirilməsinin tətbiqi və rəqəmsal kredit infrastrukturunun yaradılması istiqamətində təkliflər verilmişdir