İri kənd təsərrüfatı müəssisələrinin formalaşmasının maliyyə-büdcə mexanizminin təkmilləşdirilməsi istiqamətləri

Müasir şəraitdə iqtisadi konyunkturda davamlı olaraq dəyişikliklər baş verir ki, bu da əslində iqtisadi sistemin xarakterik xüsusiyyətlərindən irəli gəlir. Məqalədə iri kənd təsərrüfatı müəssisələrinin formalaşmasının maliyyə-büdcə mexanizminin dövlətin iqtisadi imkanları ilə əlaqəsi təhlil edilmişdir. Dünya praktikasında iri təsərrüfatların formalaşdırılmasına dəstək vermək məqsədilə maliyyə-büdcə mexanizmlərindən geniş şəkildə istifadə edilməsi səciyyəvidir. Bu mexanizm bütövlükdə iqtisadi mexanizmin mühüm tərkib hissəsi olmaqla səmərəli aqrar iqtisadiyyatın formalaşdırılmasına və kənd təsərrüfatı istehsalçılarının təsərrüfat-maliyyə fəaliyyətinin rentabelliyinin yüksəldilməsinə xidmət edir. İri kənd təsərrüfatı müəssisələrinin formalaşdırılmasının maliyyə-büdcə mexanizminin təkmilləşdirilməsi ilk növbədə kənd təsərrüfatı istehsalının gəlirliliyinin artırılmasına xidmət edir. Məqalədə, həmçinin iri korporativlərin formalaşdırılması zamanı ilk növbədə prioritet sahələrin seçilməsinə üstünlük verilməsi və bu zaman maliyyələşmə tədbirlərinin, eləcə də maliyyə-büdcə mexanizmlərinin təkmilləşdirilməsinə istiqamətlənmiş tədbirlərin də bu çərçivədə gerçəkləşdirilməsilə bağlı təhlillər aparılır. Kənd təsərrüfatı müəssisələrinin maliyyə-büdcə mexanizminin təkmilləşdirilməsinə və stimullaşdırılmasına istiqamətlənmiş tədbirlər təsnifləndirilərək müvafiq təkliflər verilmişdir.