Azərbaycanda kənd təsərrüfatı ilə yeyinti sənayesinin inteqrasiyasının inkişaf prioritetləri

Xülasə

Məqalədə Azərbaycanda kənd təsərrüfatı məhsulları istehsalının artırılmasının yeyinti sənayesinin inkişafına təsiri məsələləri araşdırılır. Kənd təsərrüfatının yeyinti sənayesi ilə inteqrasiyası, sahələrin balanslaşdırılmış inkişafı zəruri hesab edilir. Azərbaycan müstəqilliyini bərpa etdikdən sonra kənd təsərrüfatı ilə yeyinti sənayesinin inteqrasiyasına xüsusi diqqət verilməsi, inteqrasiyanın ərzaq təhlükəsizliyinin təmin olunmasında rolunun artırılması üçün görülən tədbirlərin sistemli aparılması ön plana çəkilir. 1991-2019-cu illərdə kənd təsərrüfatı məhsulları istehsalının artırılması meyilləri, sosial-iqtisadi vəzifələrin miqyası baxımından kənd təsərrüfatının dayanıqlı inkişaf prioritetləri müəyyən edilir.

Göstərilir ki, emal məhsulları istehsalının artırılması kənd təsərrüfatının inkişafı ilə yanaşı sahənin özünün strukturunun təkmilləşdirilməsindən, xammalın kompleks emalı və tullantısız texnologiyaların tətbiqindən, yeyinti sənayesində istehsal-satış prosesinin marketinq idarəetmə sisteminin formalaşdırılmasından çox asılıdır. Yeyinti sənayesinin dinamik inkişafını təmin etmək üçün inteqrasiya gücləndirilməli, tənzimləmə mexanizmi təkmilləşdirilməlidir.