ISO standartlarının yaşıl transformasiyada rolu

Qlobal istiləşmə və onun təsirləri artdıqca bir sıra beynəlxalq qurumlar, o cümlədən Beynəlxalq Standartlaşdırma Təşkilatı (ISO) tərəfindən bu təsirləri minimum səviyyəyə endirmək üçün bir sıra standart, spesifikasiya və rəhbəredici göstərişlər işlənib hazırlanmışdır. Bu sənədlər şərti olaraq “yaşıl” adlandıra bildiyimiz ISO 14000 və ISO 14060 seriyalı 29 standartdan ibarətdir. Təqdim edilən məqalədə onlardan yalnız müəssisə və təşkilatlarda ətraf mühitin mühafizəsi, istixana qazlarının emissiyalarının (İQE) inventarlaşdırılması, məhsulun karbon izinin hesablanması və müvafiq tədbirlərin layihələndirilməsi məsələlərinə birbaşa aidiyyəti olan standartlara diqqət ayrılmışdır. Həmin standartların qlobal istiləşmə və onun təsirləri ilə mübarizədə yeri və əhəmiyyəti araşdırılmış, karbon bazarlarının formalaşdırılması dövründə aqrar sahənin üzləşdiyi çağırışlara qarşı cavab tədbirləri barədə tövsiyələr verilmişdir.