Rəqəmsal transformasiya vasitəsi ilə Azərbaycanda kənd təsərrüfatının inkişafının sürətləndirilməsi

Azərbaycanın qeyri-neft ixracı potensialının mövcud səviyyədən dəfələrlə çox olduğu elmi araşdırmalarla təsdiqlənmişdir. Bunun üçün də Azərbaycan hökuməti ixrac əsaslanan iqtisadi inkişafa nail olmaq üçün qeyri-neft ixracatını artırmağı hədəfləyir. Bu məqsədə çatmaq üçün vacib elementlərdən biri iqtisadi fəaliyyətlərin rəqəmsal transformasiyasıdır, xüsusilə də bunun qeyri-neft ixracında mühüm paya sahib olan kənd təsərrüfatı sektorunda tətbiqidir. Kənd təsərrüfatı ərzaq təhlükəsizliyinin təmin edilməsi, qeyri-neft ixracı və qeyri-neft ÜDM formalaşması baxımından Azərbaycan iqtisadiyyatında mühüm rol oynayır. Bu məqsədə töhfə vermək üçün Azexport.az portalı və əlaqədar elektron ticarət infrastrukturu formalaşdırılmışdır. Azexport.az portalı Azərbaycan şirkətlərinin, xüsusən də aqrar istehsalçıların ixrac imkanlarının artırılmasına, onların real satışa keçməsinə kömək edir. Bununla da ölkədə yeni iş yerlərinin yaradılmasına, mövcud iş yerlərinin qorunub saxlanılmasına və dayanıqlı inkişafa töhfə verir. Bu araşdırmada innovativ və alternativ alətlər vasitəsi ilə qlobal dəyər zəncirinə qoşulmaq imkanlarına toxunulur və bu istiqamətdə həyata keçirilən tədbirlər qiymətləndirilir. Eyni zamanda rəqəmsal transformasiyanın aqrar islahatların növbəti mərhələsində oynayacağı rol, qeyri-neft sektoru daxilində ixracın şaxələndirilməsi və aqrar məhsullarının ixrac potensialının artırılması ilə bağlı təkliflər irəli sürülür.